خواجه احمد دمائي: خواجه قاضي احمد دمائي 1112 هه/ 1700ع ڌاري تعلقي سيوهڻ، ضلعي ڄام شوري جي ڳوٺ ’احمدين‘ ۾ پيدا ٿيو. هيءُ ڳوٺ ٽلٽيءَ جي ڀرسان آهي. ابتدائي تعليم پنهنجي والد محمد صديق کان ورتائين. ان کان پوءِ سيوهڻ جي مشهور عالم علامه عبدالواحد صديقي پاٽائيءَ کان سيوهڻ ۾ تعليم ورتائين. تعليم مڪمل ڪري، ديهه دِم، تعلقي قاضي احمد، ضلعي نوابشاهه (موجوده بينظيرآباد) ۾ سڪونت اختيار ڪيائين، کيس لاکاٽ پرڳڻي جو قاضي مقرر ڪيو ويو.
خواجه محمد زمان لنواريءَ واري جو مريد ٿيو. خواجه قاضي احمد دمائيءَ ڪيترا ڪتاب لکيا، جن ۾: ’شوق نامه‘ ۽ ’مڪتوبات شريف‘ مشهور آهن، جيڪي فارسيءَ ۾ لکيل آهن. عربي ۽ فارسيءَ جو وڏو عالم هو. سندس عربيءَ ۾ مخدوم عبدالرحيم گرهوڙيءَ ڏانهن لکيل خط دستياب ٿيو آهي.
16 ذوالقعد 1223 هه/ 3 جنوري 1809ع ۾ 109 سالن جي وڏيءَ ڄمار ۾ وفات ڪيائين. سندس قبر قاضي احمد شهر ۾ آهي.
1809.01.03 عيسوي
16 ذوالقعد 1223 هه/ 3 جنوري 1809ع ۾ 109 سالن جي وڏيءَ ڄمار ۾ وفات ڪيائين. سندس قبر قاضي احمد شهر ۾ آهي.